Background: Sibusiso Vilane u velekiwile eShongwe eka xifundzha-nkulu xa Mpumalanga eAfrika Dzonga. Loko a ha ri ni malembe ya khume-n’we, tata wa kwe a teka xiboho xa ku va ndyangu wu rhurhela eSwaziland. Hi lembe ra 1996 Sibusiso u hlanganile na John Doble loyi a nga va munghana lo’nkulu ni mupfuni swinene leswaku Sibusiso a kuma mimpfuneto (sponsorship) leyi faneleke ku fikelela rendzo ra yena ra ku fika emaninginingini ya tintshava. U sungurile ku gonya tintshava hi lembe rona rero hi ku gonya ntshava leyi vuriwaka Drakensberg. Hi lembe ra 1999 u gonyile ntshava ya Kilimanjaro kutani a ya emahlweni eka Himalayas hi lembe ra 2002. Sibusiso u vile wantima wa Afrika Dzonga a ri yexe ku hlula eka mimphikizano ya ku landzelelana ya ku veka vutomi enghozini leyi tivekaka hi Three Poles Challenges.

Sibusiso i nuna wo rhandzeka wa Nomsa ni tatana wa xiviri wa vana va mune. U seketela swidingo swa tidyondzo swa vanhwanyana vanharhu hi ku hlonipha lava va ngheniseke xandla eka tidyondzo ta yena laha vatswari va yena a va nga fikeleli kona.

U sungurile tidyondzo ta Field Game Ranger eSwaziland hi lembe ra 1993. A nga se endla sweswo, a tirha mintirho ya mavoko ni ku risa timbuti. Tani hi murhandzi wa ku gonya tintshava, u kumile kona ntokoto wa leswi landzelaka:

Hi lembe ra 2005 Sibusiso u fikelerile maninginingi ya ntshava ya Everest na kambe ni nkulukumba Ranulph Fiennes na Alex Harris endzhaku ka loko a fikile exintsandzanini xa ku pima xikarhi xa misava xa le n’walungwini (North Ridge) hi rihlanguti leri tikelaka vo tala ku gonya ha rona. Ku hlula loku a swi vula leswaku hi yena wo sungula eka maAfrika ya ntima ku gonya maninginingi ya ku leha ngopfu ka mbirhi na kona hi ma tlhelo/tindlela timbirhi to hambana. Hikwalaho ka ku hlula loku, tindzhawu ta vuhlayiselo (charities) tinhharhu ti vuyeriwile hikwalaho ka ku gonya ka yena emaninginingini ya tintshava, leti ku nga The Birth to Twenty Research Programme eyunivhesiti ya Wits, The Africa Foundation na SOS Children’s Village eSwaziland.

Hi lembe ra 2008, Sibusiso ni munghana wa yena Alex Harris va vile maAfrika Dzonga yo sungula ku ya exintsandzanini xa ku Pima xikarhi xa misava xa le dzongeni (South Pole) va nga pfuniwanga na swintsanana. Nkhikhi ni ku navela ka Sibusiso a swi tlhontlha vanhu va ku hambana-hambana ngopfu-ngopfu vana. Ku sukela lembe ra 2006,Sibusiso a ri muhluri wa Afrika wa Lifeline Energy (khale ka Free Play Foundation). Mpfhumbha leri kan’we ni vapfuni (sponsors) lavo tala a va seketela Sibusiso,Lifeline Energy yi kotile ku seketela swiyanimoya swa madzana-nharhu eka vana va xifundzha-ntsongo xa Nkomazi, laha Sibusiso a tshama kona.

Hi lembe ra 2012,Sibusiso u vile xirho xi kulu xa British Alpine Club. Sibusiso sweswi i wantima wa Afrika Dzonga a ri yexe loyi a nga hlula eka ka ku gonya maninginingi lawa yo leha swinene lawa ya vuriwaka Three Poles Challenges lawa ku Nga Everest, South Pole na North Pole. Hi lembe ra 2012, Sibusiso u katsiwile eka ” Green Book” ya Afrika Dzonga ya vanhu va dzana lava tlhontlhaka vanhu hi swa mintlangu eka ntirho lowu a wu simekiwile hi Holobye wa mintlangu Fikile Mbalula.

Hi ravumune hi N’wendza-mhala lembe ra 2011 Sibusiso u tivisiwile eka Hosi-nkati ya Nghilandi(England) endzhawin ya vuamukelo ya xigodlo(Palace) xa Buckingham. Ku xixima loku ku simekiwile leswaku va tekela enhlokweni vahluri lava a va nghenelerile eka ku gonya maninginingi ya tintshava ta matiko ya misava.